EFE | O condutor dun quad, que tentou escapar da Policía Local de Lugo de forma temeraria polas rúas da cidade, foi finalmente interceptado pola patrulla que o perseguía e, por mor do seu comportamento, perderá de golpe 14 puntos do seu permiso de conducir.
Segundo informou a propia Policía Local, os feitos sucederon o pasado luns pola mañá, cando nun dos controis de seguridade establecidos no polígono industrial do Ceao os axentes viron que o condutor dun quad, ao decatarse da súa presenza, deu a volta e emprendeu a fuga.
A patrulla púxose de forma inmediata a perseguilo e viu como “de forma totalmente temeraria” realizaba “xiros a gran velocidade e derrapaxes perigosas”, ademais de zigzaguear entre os vehículos, saltar un semáforo en vermello e facer caso omiso, en todo momento, ás indicacións dos axentes.
Finalmente foi interceptado e os axentes denunciárono por conducir de forma temeraria, non respectar un semáforo en vermello, desobedecer as súas propias ordes e non presentar o vehículo á ITV no prazo previsto. Ademais de perder catorce puntos, terá que pagar 1.100 euros de multa.EFE
