EFE | A xefa da Unidade de Coidados Intensivos no HULA, Ana Ferreiro, fai un chamamento a reducir “o contacto social” na medida do posible, porque estamos “nun momento álxido” da pandemia, cun elevado número de hospitalizacións e con ingresos de xente bastante nova. Son “a responsabilidade social e a autodisciplina” o que “vai facer que isto se corte”.
“Non hai outra. Hai que reducir o contacto social. Ter unha serie de regras e manter unhas normas por un tempo limitado, porque nos van a beneficiar moito a longo prazo para controlar a pandemia”, engadiu en declaracións a EFE.
Recoñeceu, ao ver determinados comportamentos irresponsables, que sente “rabia e impotencia”. “Terían que pasar pola UCI e ver como están os pacientes. Non de 20 ou de 30 anos, pero con idades que están moi preto, e que están entubados e con moito risco vital”, engadiu. Ademais, lembrou que esta situación non só está relacionada cos “mozos”, porque tamén hai “xente maior que é moi irresponsable”.
En canto ao perfil dos pacientes ingresados na UCI, informa de que si se percibe “algunha diferenza” nesta terceira onda. “O máis significativo é a idade. É xente máis nova e moitos deles sen patoloxías asociadas, aínda que a normalidade é que moitos deles teñan patoloxías asociadas. Outra das diferenzas é que ao ser máis novos, evolucionan mellor”, aclarou, e a “estancia media na UCI é menor”.
