Un home de 92 anos diagnosticado de coronavirus faleceu este domingo na residencia da Pastoriza, da que era usuario, segundo comunicaron a última hora deste mércores fontes do Servizo Galego de Saúde (Sergas). A provincia alcanza, así, os 149 falecementos relacionados coa pandemia.

Na residencia da Pastoriza, detectárase un gromo cunha decena de positivos o pasado 5 de xaneiro. Axiña se confirmaron máis casos e no día de hoxe, o Sergas e Política Social notificaban un total de 53 casos activos neste xeriátrico: 38 usuarios e 15 traballadores.

Canda este deceso, o Sergas tamén informou da morte doutras cinco persoas: unha muller de 84 anos no CHUAC; outra de 88 no hospital HM-Modelo Belén da Coruña; un home de 86 anos no Hospital de Verín; unha dona de 91 no CHOP; e un home de 100 anos que faleceu na residencia integrada Bo Día Sagunto de Vigo, procedente da residencia Moledo. Todos eles tiñan patoloxías previas.