O sindicato Unións Agrarias demanda unha maior dotación de persoal administrativo na oficina agraria comarcal de Castroverde que, segundo afirman, leva dende marzo sen técnico fixo. A situación provoca “constantes queixas” entre os agricultores e gandeiros, afectados polo “colapso”, os atrasos na atención e na tramitación de expedientes

Segundo a organización sindical, ata hai un mes a oficina de Castroverde estaba atendida unicamente os mércores por un técnico que se desprazaba desde Lugo, “pero agora xa nin iso”, critican. Refiren un único traballador administrativo, “o que supón que cando este colle vacacións, as persoas que precisan rexistrar un escrito non poden facelo ata que estea de volta”.

Esta oficina comarcal atende tamén os produtores do concello de Baleira, unha zona que suma máis de 500 explotacións e que se sitúa á cabeza de Galicia en producións gandeiras. Este “motor económico” atópase cun “atranco grave” ante a deficiencia na atención da oficina: complícanse os trámites de subvencións, inspeccións e visitas técnicas, certificacións, servizos de asesoría…  “É así como a Xunta de Galicia apoia o noso rural?”, pregúntanse.

Ademais, o sindicato afea que a Xunta de Galicia anunciara o reforzamento das oficinas agrarias durante a presentación do Plan Lácteo. “A realidade indica todo o contrario”, conclúe.