O sábado 4 de xullo, ás 11:00 horas, a vila de Meira convértese nun gran taboleiro de xogo ao aire libre coa chegada de XOGAL 2026. Baixo o título “A Procura das Reliquias do Císter”, o percorrido arranca na Praza do Concello e desprega un escape room gratuíto que combina patrimonio, lendas e enigmas no entorno do histórico mosteiro cisterciense.
Premios, sorteos e aperitivo de peche
A xornada inclúe premios para os equipos máis rápidos, sorteos de dúas cestas de produtos típicos da comarca entre todas as persoas participantes e un aperitivo de peche para celebrar a experiencia. A actividade está aberta a público de todas as idades e está pensada para gozala en familia, en parella ou con amizades.
Sen descargas, sen aplicacións: só un móbil
A experiencia desenvólvese a través do navegador do móbil, sen necesidade de descargar ningunha aplicación. Cada equipo só precisa un teléfono con batería, conexión a internet e calzado cómodo para percorrer a vila. A inscrición é gratuíta e pode formalizarse en escapeo.com/xogal.
Dez concellos galegos, un verán de xogo
Meira é a sexta cita dun percorrido que entre xuño e setembro pasa por dez concellos galegos: Cervo, Lourenzá, Guitiriz, Negueira de Muñiz, Monterroso, Meira, A Fonsagrada, Castro de Rei, Taboada e Foz. Cada cita conta cunha aventura propia, deseñada a partir da historia, o patrimonio e as lendas de cada vila. O proxecto está impulsado polos GDR Terra Chá, Terras de Miranda, Montes e Vales Orientais e Miño Ulla en colaboración coa empresa galega Escapeo.
Sobre Escapeo
Escapeo é unha empresa galega especializada en experiencias de escape room ao aire libre e turismo gamificado. A través dunha plataforma propia accesible desde o móbil, converte vilas, barrios e contornos naturais en taboleiros de xogo nos que descubrir patrimonio, lendas e historia mentres se resolven enigmas.
