O número de persoas ingresadas con coronavirus nos hospitais da provincia rexistra unha importante baixada ás portas de Nadal: fronte aos 18 pacientes de onte, hoxe son 13. Deles, catro están na UCI do HULA e os outros permanecen en planta, distribuídos da seguinte maneira: sete no HULA, un na Mariña e outro en Monforte.

Porén, se ben o total de casos activos segue á baixa (356, é dicir, catro menos), aumentan os positivos diarios confirmados a través de PCR. Segundo o Sergas, detectáronse 26 casos novos nas últimas 24 horas.

En canto aos falecementos, onte Sanidade comunicaba que unha muller de 95 anos diagnosticada de Covid finaba no HULA. Son xa 146 mortes en Lugo dende o inicio da pandemia, malia que o Sergas compute só 144 (non inclúe o deceso de dous usuarios de residencias que faleceron en Santiago de Compostela).

Por outra banda, ata o momento curáronse 6.339 persoas e realizáronse 119.586 PCR. Delas, 844 probas foron feitas onte (526 máis ca o día anterior).