Todos os estudantes que participaron no cribado que realizou esta semana o Sergas en dous institutos de Vilalba deron negativo. En total foron 200 alumnos do IES Lois Peña Novo e o IES Santiago Basanta Silva. No primeiro dos dous centros presentáronse arredor da metade dos citados, mentres que no segundo a participación foi case total.
Así o comunicou a Consellería de Sanidade, que decidira facer as probas PCR co obxectivo de buscar pacientes asintomáticos no municipio ante a elevada incidencia. O Sergas tamén realizará PCR ao persoal traballador no Servizo de Axuda ao Fogar (SAF) e outros servizos municipais.
ASILO DE VILALBA
Mentres, a situación na residencia de maiores de Vilalba segue preocupando. Segundo datos de Política Social, un total de 32 usuarios continúan figurando como positivos en coronavirus tras recibir a alta outros sete. Porén, hai 29 traballadores contaxiados, polo que este asilo sitúase como o centro xeriátrico galego con máis persoal positivo.
