A alcaldesa de Vilalba, a socialista Elba Veleiro, avoga por que se manteñan as restricións no concello, xa que hai que ser “suficientemente responsables para priorizar” a saúde “por encima de calquera outro interese”.
Veleiro asegurou que “o máis importante é preservar a saúde das persoas”. “Entón, se temos que estar uns días máis con restricións máximas, estaremos”, manifestou. A rexedora fixo un chamamento “á responsabilidade individual”, dado que así se “contribuirá a que isto conclúa o máis rápido posible e co máximo de garantía”.
Aínda que baixan os contaxios, o certo é que aínda son positivos un total de 133 veciños, dos cales 65 son da residencia de maiores e do asilo, que chegaron no seu pico máis alto de incidencia a máis de 200 casos. Por iso, a alcaldesa apela de novo á “prudencia”.
Con todo, Elba Veleiro celebrou que “parece que se van estabilizando” os casos activos na residencia, que fai tres semanas tivo que ser intervida pola Xunta.
