Segue baixando o total de casos activos por coronavirus na área sanitaria de Lugo: son 885, 26 menos ca os contabilizados onte, segundo o reconto ofrecido polo Servizo Galego de Saúde (Sergas) este xoves 2 de decembro. Tamén descenden os casos diarios, ao confirmarse 31 novos positivos por PCR nas últimas 24 horas.
Así mesmo, a presión asistencial tamén segue coa súa tendencia á baixa, ao constar 30 hospitalizacións (dúas menos ca onte). En concreto, o Hospital Universitario Lucus Augusti (HULA) atende dous pacientes na UCI (=) e 21 en planta (-1); o da Mariña, tres (-1); e o de Monforte, outros tres (-1). Non obstante, o Sergas notifica hoxe un paciente positivo no hospital Privado Polusa.
No histórico da provincia, contabilízanse 126 vítimas mortais da pandemia. O último foi un home de 79 anos que faleceu no HULA, segundo comunicaba onte Sanidade.
Por outra banda, ata o momento curáronse 5.339 pacientes (déronse 58 dende a anterior actualización de datos) e fixéronse 105.040 PCR, o que implica que na última xornada se realizaron 573 probas, case 150 menos ca un día antes.
GALICIA
No conxunto da comunidade galega, vólvese experimentar unha suba dos contaxios (350 casos diagnosticados nas últimas 24 horas). Os casos activos, porén, continúan á baixa e sitúanse nos 7.419 (118 menos ca o mércores). Segundo o parte do Sergas, tamén mingua a presión nos hospitais, con 349 pacientes en planta (quince menos) e 65 ingresadas nas UCI (dúas menos).
