O total de casos activos por coronavirus continúa en descenso na área sanitaria de Lugo: son 911, 24 menos ca os contabilizados onte, segundo o reconto ofrecido polo Servizo Galego de Saúde (Sergas) este mércores 2 de decembro. Por outra parte, os casos diarios mantéñense practicamente invariables respecto dos do día anterior: nas últimas 24 horas confirmáronse 38 novos positivos por PCR.
O dato máis significativo da xornada vén da man das hospitalizacións, que pasan das 41 de onte ás 32 de hoxe (nove menos). En concreto, o Hospital Universitario Lucus Augusti (HULA) atende dous pacientes na UCI (-1) e 22 en planta (-6); o da Mariña, catro (-2); e o de Monforte, outros catro (=).
Non obstante, nesa baixada de persoas ingresadas hai que ter en conta os dous falecementos que tiveron lugar onte no HULA, segundo comunicou o Sergas. A morte de dúas usuarias das residencias de Guntín e Vilalba eleva as vítimas mortais da pandemia en Lugo ata as 125.
Por outra banda, ata o momento curáronse 5.281 pacientes (déronse 62 dende a anterior actualización de datos) e fixéronse 104.467 PCR, o que implica que na última xornada se realizaron 719 probas.
