Xa ninguén se sorprende ao coñecer as novidades que introduce cada ano o belén de Momán (Xermade). Desta volta, a reivindicativa representación do Nacemento inclúe un detallado protocolo anti-covid e un cárcere para os corruptos.
Así, a capela de San Antón de Momán exporá este Nadal un belén moi adaptado a estes tempos de pandemia. O párroco, Luis Ángel Rodríguez Patiño, explica que este ano só haberá seis nenos pastores e “deberán manter unha distancia de seguridade”. Ademais, “se se instala unha taberna, pecharase a partir das dez da noite”, de acordo ao toque de queda imposto polo Goberno.
Do mesmo xeito, a participación no Belén queda restrinxida para todo o persoal non esencial (“o carro, as lavandeiras, o panadeiro, os romanos de Herodes…) e en ningún caso se poderá superar o 50% da capacidade, sinala Rodríguez Patiño. Iso si, “as ovellas pequenas, os porcos, as cabras e os patos non contan“, precisa.
O cura decidiu que San Xosé, a Virxe e o Neno poden estar xuntos no pesebre, xa que son convivintes, pero colocarase un cordón de seguridade a dous metros do berce. As restricións tamén afectan aos Magos de Oriente, que “terán que vir antes para pasar a corentena” e “facer unha PCR”. “Os camelos quedarán na última cidade confinada pola que pasen”, engade.
Ademais, tampouco está permitida a presenza do anxo “no caso de que aletee e teña un efecto aerosol”, por se acaso iso puidese propagar o virus.
