EFE | A alcaldesa de Vilalba, Elba Veleiro, confirmou que “algún” dos 117 usuarios da residencia afectados por coronavirus presenta, efectivamente, “sintomatoloxía” asociada á covid-19. Con todo, precisou que “ningún deles está grave” nin tivo que ser hospitalizado.
Iso si, outros catro usuarios foron derivados ao Centro Galego de Desenvolvemento Integral (Cegadi), en Santiago de Compostela, de modo que xa son 27 os anciáns trasladados a estas instalacións dende o asilo de Vilalba, intervido pola Xunta de Galicia.
En canto á situación no municipio, sometido a restricións especiais desde o pasado venres, a alcaldesa considera que a evolución está a ser “razoablemente boa” co concello pechado perimetralmente e a hostalería clausurada de forma temporal.
De feito, a pesar do gran número de PCR realizadas nos últimos días, onte pola tarde había 190 casos activos, de modo que non se produciu un incremento da incidencia do virus no municipio. Aínda así, chama á “prudencia, porque a situación pode cambiar en calquera momento.
