O conselleiro de Sanidade, Julio García Comesaña, explicou esta mañá en rolda de prensa que a situación epidemiolóxica parecía mellorar en toda a Galicia urbana, agás en Vigo e en Lugo. O comité clínico achaca a mala evolución da cidade lucense a un mal cumprimento das medidas restritivas.
O responsable de Sanidade sinalou que en Lugo “non se están cumprindo” as medidas “de maneira franca”. Así o salientou nunha intervención na que deu conta das últimas análises dos expertos sanitarios que asesoran o Goberno galego.
Dito comité aprecia unha tendencia positiva en todas as cidades, pero Lugo e Vigo teñen un índice de reprodución do virus (número de contaxios que provoca un infectado) por enriba da media de Galicia, que segue por debaixo do 1 en Ritmo reprodutivo básico (R0)
CHANTADA, VILALBA E SARRIA BAIXO LUPA
Comesaña referiuse tamén ao concello de Chantada e ás áreas de Sarria e Vilalba como algunhas das zonas sobre as que está posta a lupa por parte do comité clínico debido á súa elevada incidencia do virus. O mesmo ocorre co concello ourensán da Rúa.
Xa hai 68 concellos galegos con medidas restritivas esixentes, pero Comesaña admitiu que “non é suficiente, porque segue habendo contaxios e segue habendo mortes“. “Non podemos baixar a garda, temos que dobrar o esforzo”, afirmou.
