A área sanitaria de Lugo rexistra este mércores 11 de novembro un descenso de casos activos por Covid-19. Segundo os datos ofrecidos por Sanidade, hoxe hai 1.129 pacientes, o que supón 19 menos ca no día de onte. No entanto, diagnosticáronse 34 novos positivos por PCR nas últimas 24 horas, cifra similar á que daba Sanidade na xornada anterior e que amosa certa tendencia á baixa nos últimos días.
Do mesmo xeito, tamén hai menos persoas ingresadas nos hospitais da provincia: 59 (catro menos), mais a UCI do HULA pasou a atender cinco pacientes (+1). En concreto, o Hospital de Monforte conta 6 hospitalizacións relacionadas co coronavirus; o da Mariña, 15; e o HULA, 38.
Por outro lado, a provincia de Lugo lamenta as 108 vítimas mortais dende o inicio da pandemia. As últimas mortes producíronse no día de onte, ambas vinculadas a residencias de anciáns.
Ata o momento realizáronse en Lugo 88.076 probas PCR, das cales 655 foron nas últimas 24 horas.
GALICIA
Os datos para Galicia revelan unha repunta nos contaxios a pesar de que os casos activos seguen baixando. Na xornada de onte detectáronse 520 novos positivos, mentres que os pacientes con infección activa son 9.869 (83 menos ca o martes). Pola contra, aumentan lixeiramente as hospitalizacións ata as 611 (+2), dos cales 95 permanecen nas UCI.
No histórico da comunidade, faleceron 1.024 persoas que contraeran o virus. Este martes a Consellería de Sanidade notificou 15 mortes, unha das maiores cifras rexistradas na segunda onda en Galicia.
