A Policía Local de Lugo denunciou o responsable dun local de hostalaría da cidade por facer un uso inadecuado da máscara e falar con clientes “a escasos centímetros” que consumían na barra.
Así o informou a Policía Local, que relatou que os feitos sucederon este luns, 2 de novembro, cando unha patrulla da Unidade Territorial de Policía de Barrio levou a cabo unha inspección nun local de hostalaría da rúa Nicomedes Pastor Díaz.
As mesmas fontes policiais detallaron que axentes detectaron que a persoa que rexenta o establecemento atopábase no interior da barra e “non facía un uso adecuado da máscara” mentres falaba cos clientes “a escasos centímetros”.
Por iso, a Policía Local tramitou acta denuncia por infracción á Lei de Saúde de Galicia con motivo do incumprimento das restricións actuais debidas á pandemia pola Covid-19.
