Os positivos por Covid-19 confirmados por PCR nas últimas 24 horas seguen en descenso na provincia de Lugo tras detectarse 26 novos casos, fronte aos 39 de onte e aos máis de 100 do domingo. Ademais, o número total de positivos activos tamén se reduce: 963 pacientes contaxiados (20 menos). Porén, soben a 41 os hospitalizados con Covid-19 na área sanitaria (+3), dos cales cinco seguen na UCI (sen cambios).
Son cifras que ofrece a Consellería de Sanidade na mañá deste 3 de novembro, despois dun luns no que se bateu o récord de mortes por coronavirus na segunda onda da pandemia. Sanidade notificou onte 21 vítimas mortais, unha delas na provincia de Lugo.
Esta redución no ritmo de novos positivos tamén chega na antesala da revisión das restricións de mobilidade impostas pola Xunta dende o venres. O comité clínico decidirá na reunión desta tarde a súa vixencia.
CINCO CONCELLOS EN ALERTA VERMELLA
Por outra parte, e de acordo co mapa de cores que achega a Xunta sobre a incidencia do coronavirus por concellos, A Fonsagrada xa non está en alerta vermella. O seu nivel de aviso pasa a amarelo (nivel 1). Pola contra, Burela súmase á lista de municipios en alerta máxima, xunto a Lugo capital, Viveiro, Cervo e Monforte de Lemos.
Bóveda e Cospeito son os únicos concellos lugueses que están en situación de alerta laranxa (nivel 2) este martes.
GALICIA
Para o conxunto galego, Sanidade indica unha suba de casos activos ata os 9.376 (+84) a pesar de que os novos positivos detectados nas últimas 24 horas baixaron ata os 425 (fronte aos case 600 de onte ou os máis de 700 da fin de semana).
En Galicia, aumentan a 545 os pacientes ingresados (22 máis ca o luns), e deles 79 están a ser atendidos nas Unidades de Coidados Intensivos. O número total de falecidos dende o inicio da pandemia alcanza os 944.
