Aberto o prazo para apuntarse ós 14 postos de traballo do programa “Prende!”. A oferta laboral, realizada pola Deputación de Lugo, permanecerá vixente ata o vindeiro venres 2 de outubro. Os requerimentos para entrar á proba de selección son diversos: por unha banda, os interesados deben contar con entre 16 e 30. Á parte, deben estar inscritos no Sistema Nacional de Garantía Xuvenil e, ademais, empadroados nos 58 concellos con menos poboación.
Esta última condición vén definida pola natureza do Programa “Prende!”, articulado polo órgano provincial co obxectivo de fixar poboación en aqueles Concellos onde o ritmo de declive demográfico é maior. Segundo destacan dende o órgano provincial, os perfís profesionais que buscan as empresas beneficiarias do plan son os seguintes: 1 peón forestal, 2 axudantes de camareiro/a, 1 fontaneiro/a, 4 peóns de gandería, 2 camareiro e 1 administrativo, 1 peón agrícola, 1 bodegueiro/a e 1 oficial de gandería.
AS EMPRESAS SELECCIONAN
Unha vez que remate o prazo de inscrición, a Deputación procederá a facer unha preselección dos perfís que mellor se adapten ás ofertas de traballo, para que, finalmente, sexan as empresas as que seleccionen as persoas contratadas. “Poden inscribirse todas as persoas que cumpran cos requisitos, aínda que terán prioridade os participantes na primeira fase do programa Prende!”, apunta a Deputación.
O Prende! conta con dúas fases. Na primeira, xa rematada, medio cento de mozos e mozas recibiron formación en catro actividades profesionais cun importante peso no tecido produtivo da provincia e que contan cun gran potencial de crecemento: enerxías renovables, hostalería e turismo, xestión forestal e agricultura e gandería.
