O secretario xeral do PSdeG, Gonzalo Caballero, criticou este sábado a concentración de servizos sanitarios na cidade de Lugo decretada pola Xunta de Galicia. Nunha visita a un centro de saúde desta cidade, acompañado pola alcaldesa Lara Méndez e membros da dirección provincial do partido, cargou contra a medida adoptada polo Goberno galego que supón a concentración no centro de saúde de Fingoi dos servizos de atención primaria e pediatría durante a fin de semana.
“Levaba o PP no seu programa electoral esta medida. Feijóo dixo ao longo da campaña que ía tomar esta decisión que afasta os servizos sanitarios da xente”, dixo o dirixente socialista en declaracións aos medios. “Unha medida que non está acordada cos colectivos profesionais nin cos sindicatos nin coas autoridades locais”, engadiu, polo que chamou a mobilizarse en defensa da sanidade pública e, en concreto, polo fortalecemento dos servizos de atención primaria.
Neste sentido, subliñou que o Goberno galego recibiu do Estado 268 millóns de euros extraordinarios “para fortalecer o sistema sanitario” e por iso expresou o seu rexeitamento a unha decisión que provoca “que haxa servizos sanitarios máis recortados e máis afastados da cidadanía”.
Pola súa banda, Lara Méndez trasladou que esta reforma da Xunta “só obedece a cuestións puramente económicas” e sostivo que a atención primaria é “un muro de contención da propia pandemia”, polo que corresponde dotala de persoal para afianzar a súa calidade.
