A portavoz socialista do goberno bipartito (PSOE-BNG) da deputación de Lugo, Pilar García Porto, anunciou que o organismo provincial destinará 185.000 euros á subministración de material informático para a sede da UNED na cidade, tal e como acordou este venres a xunta de goberno.
Trátase, dixo, da “subministración de material informático e de novas tecnoloxías“, como ordenadores, impresoras de alto rendemento ou sistemas de videoconferencia. “Isto vai permitir a renovación do equipamento tecnolóxico das diferentes dependencias da UNED, como o salón de actos, a aula de extensión ou o centro de procesos de datos”, debullou.
Porto engadiu que, con este investimento, vaise a mellorar tamén “a calidade dos contidos dixitais da plataforma telemática deste centro asociado da UNED”. A deputada provincial lembrou que foi a Deputación de Lugo a que financiou a construción do devandito centro, dado que era “a única provincia galega” que non contaba con esta infraestrutura. Nestes momentos, cifrou en 22 as titulacións de grao que aí se imparten.
BARRIO DA MILAGROSA
Ademais, durante a xunta de goberno aprobouse unha subvención de 20.000 euros para a Asociación de Veciños e Hostaleiros do barrio da Milagrosa, onde as restricións pola COVID-19 son das máis restritivas da comunidade.
Sobre esta cuestión, García Porto aproveitou para insistir en que “non” se pode “estigmatizar” a este barrio, na mesma liña argumentada polo presidente provincial, José Tomé.
Por outra banda, Porto informou da adxudicación de catro “cabinas sanitarias” ou aseos, por máis de 23.500 euros, para o Rato e varios “parques urbanos”. No Rato (Lugo cidade) atópase tamén o groso das parcelas dedicadas a hortas “urbanas”, 150, e 34 en Paraday, que se adxudicarán este mes de setembro.
