O número de casos activos de COVID en Galicia dispárase este xoves ata os 1.783 tras aumentar en 160, cun brote de 69 positivos nunha residencia no municipio do Incio. Esta xornada aumentan os contaxios en todas as áreas, salvo na de Pontevedra, que experimenta un leve descenso, e do total, 1.045 corresponden á da Coruña.
Así se desprende dos datos actualizados este xoves pola Consellería de Sanidade, que indican que do total de pacientes positivos, seis permanecen en UCI –igual que este mércores–, 64 atópanse en unidades de hospitalización convencional –9 máis–, e 1.713 en seguimento domiciliario –150 máis respecto da xornada anterior–.
Dos 1.783 casos activos, 1.045 corresponden á área da Coruña e Cee –85 máis que este mércores–; 170 á de Lugo; 141 á de Vigo –tres máis–, 80 á de Pontevedra e O Salnés –catro menos–; 157 á de Ourense –12 máis–; 113 á de Santiago –22 máis– e 77 á de Ferrol –oito máis–.
Sanidade indica, así mesmo, que, ata o momento, curáronse en Galicia 11.701 persoas, 44 máis que a xornada pasada, e faleceron 625 pacientes con COVID. A última vítima mortal, notificada este domingo, foi unha muller de 86 anos que estaba ingresada no Chuac e presentaba patoloxías previas.
Dos 1.783 casos activos na Comunidade galega, 86 están vinculados a centros residenciais, 69 máis que este mércores, en relación a 76 usuarios –65 deles dun mesmo centro no Incio– e 10 traballadores –catro da mesma residencia–. O número de PCR realizadas ata a data na Comunidade galega ascende a 290.491 fronte aos 286.968 rexistrados ata este mércores, segundo os datos de Sanidade.
BNG PIDE INTERVENCIÓN DA XUNTA NA RESIDENCIA
Nun comunicado, a deputada nacionalista Carmen Aira reclamou ao Goberno galego un protocolo para “as persoas máis vulnerables”, á vez que ofreza información detallada ás familias para que non se produza a situación que se viviu noutras residencias galegas.
Así, mostra a súa preocupación por que a metade dos 128 usuarios da residencia do Incio estean infectados, nunha situación que, ao seu xuízo, constata “a incapacidade da Xunta” ante a “segunda onda” de contagios pola COVID-19.
Ademais, Carmen Aira censura que a contratación de só dúas persoas no HULA para o rastrexo resulta “insuficiente” e afea a “opacidade” de Sanidade sobre o número de rastreadores na provincia.
