EFE | O tenente de alcalde e responsable de Mobilidade e Infraestruturas no Concello de Lugo, Rubén Arroxo, confirmou a intención do goberno local de “seguir adiante co proxecto de peonalización e humanización da Rolda da Muralla”, para liberar de “tráfico” a vía perimetral que rodea ao monumento romano.
Coa peonalización do carril interior da Rolda da Muralla, realizada xa de forma provisional, “os veciños de Lugo gañaron unha zona de paseo peonil de 2,5 quilómetros”, dixo Arroxo. O edil sinalou que este proxecto servirá para preservar o propio monumento, dado que “gran parte das fisuras na Muralla -que é Patrimonio da Humanidade- débense ás vibracións que provocan os vehículos ao circular tan preto” dela.
Desde o seu punto de vista, “a única solución a este problema é reducir o tráfico na contorna da Muralla, o que beneficiaría a cidadanía, que gañará ademais un espazo peonil na contorna do noso monumento máis querido”. De feito, mostrouse convencido de que os veciños da cidade son “favorables” de forma maioritaria ao “proxecto de humanización que está a levar adiante a área de Mobilidade”.
PARA O PP, “CHAPUZA ESTÉTICA”
O grupo municipal do Partido Popular criticou en repetidas ocasións a provisionalidade do carril peonil instalado durante o estado de alarma e cualificouno de “chapuza estética“. Non obstante, Arroxo anunciou que o seu departamento xa está “a traballar nun plan de tráfico definitivo moito máis exhaustivo”.
