Un novo descenso no número total de casos activos deixa a provincia de Lugo con 29 positivos por coronavirus, dous menos ca os rexistrados no día de onte.
Segundo información facilitada por Sanidade, non hai cambios nos hospitais: só o HULA acolle un paciente con COVID-19 en planta. Outras 28 persoas están a ser atendidas nos seus domicilios.
Os datos oficiais refiren, así mesmo, 906 altas epidemiolóxicas na provincia e 28 falecementos relacionados coa pandemia.
GALICIA
Para o caso galego, o reconto deste xoves tamén evidencia un descenso no número de positivos: 465 (-11). As Unidades de Coidados Intensivos (UCI) seguen libres de pacientes de coronavirus, e as unidades de hospitalización atenden 11 persoas co virus.
Por outra banda, no día de onte volveuse producir un pasamento vinculado co coronavirus tras case unha semana sen mortes. Era un home de 83 anos ingresado no Complexo Hospitalario Universitario de Vigo. Desta maneira, Galicia lamenta 619 vítimas mortais.
