O Concello de Lugo solicitará ao Ministerio de Fomento a cesión dun tramo de dous quilómetros da estrada N-VI ao seu paso por Lugo, comprendido dentro da zona de actuación da estratexia DUSI, para a súa integración como vía urbana.
Nunha rolda de prensa telemática onde estaban presentes a alcaldesa de Lugo, Lara Méndez, e o concelleiro de Urbanismo, Miguel Couto, confirmaban que esta petición será aprobada este mércores pola xunta de goberno local. A petición de cesión corresponde co tramo de 2,3 quilómetros, polo que circulan cada día máis de 23.000 vehículos, que vai desde a ponte branca ata a intersección da Avenida Breogán.
O obxectivo das actuacións é dar celeridade a todas as actuacións do plan DUSI e buscar a unión da cidade co Río Miño. Unha operación que a rexedora lucense enmarcou “dentro da relación de diálogo e colaboración permanente” que manteñen as dúas administracións, e que busca para a cidade lucense “un futuro verde, sustentable, conciliador e respectuoso co medio ambiente”.
OUTRAS CESIÓNS
O Concello lucense tamén solicitará a Fomento a cesión de tramo da estrada N-540 á altura de San Pedro de Calde que dá acceso ao enclave de Penales e ao núcleo do Burgo.
Á súa vez, o Consistorio lucense pediralle á Xunta a cesión dun tramo da LU-530, na rúa San Eufrasio, co fin de mellorar a seguridade do tráfico nese punto da capital. A intención do Concello é construír unha rotonda para dar solución aos problemas da conexión coa Avenida de Fontiñas.
