Os casos activos de coronavirus en Galicia diminuíron ata os 1.510 afectados, 498 menos que o venres; á vez que se rexistraron 537 altas que elevan os recuperados ata os 8.820, segundo explicou este sábado a Consellería de Sanidade. Destaca a baixada de casos en Lugo, logo do pequeno aumento deste venres. Así, houbo unha baixada de 23 casos.
Así, hai 4 en UCI, igual que o venres (todos eles ingresados na UCI do HULA), 0 en hospitalización. Ningún dos hospitais da provincia ten nestes momentos ingresados pacientes Covid-19 nas súas unidades de hospitalización e hai 95 en domicilio (22 menos ca onte, cando se rexistraban 117 casos).
No conxunto de Galicia séguense rexistrando contaxios e os casos activos permanecen distribuídos nas áreas sanitarias, aínda que a maior parte concéntranse en Vigo, con 401 pacientes con COVID-19 (77 menos que o venres). Por detrás, A Coruña mantén 331 casos de coronavirus (-163), 277 Ourense (-43), 244 Santiago (-169), 99 Lugo (-23), 93 en Pontevedra (-14) e 65 en Ferrol (-9).
Respecto da atención que están a recibir os enfermos de coronavirus, as UCI galegas atenden a 19 pacientes (tres menos que onte), mentres que 102 permanecen en unidades de hospitalización e 1.389 nos seus domicilios.
As altas, pola súa banda, chegan aos 8.820 pacientes e as PCR realizadas nas últimas horas ascenden a 1.652, o que suma un total de 124.108 probas desde o inicio da pandemia na Comunidade.
