EFE | A Asociación Provincial de Empresarios de Hostalería de Lugo (APEHL) solicitou aos 67 concellos da provincia que fagan súa unha batería de medidas para que a volta á actividade dos establecementos de hostalería sexa “viable” e, desa forma, “manter os empregos que había antes do 14 de marzo”.
“Aínda que cada vez está máis preto a apertura dos negocios de hostalería, esta non será nas mesmas condicións de hai dous meses”, indica o presidente da APEHL, Cheché Real. “Un dos nosos obxectivos é manter os empregos que había antes do 14 de marzo, xa que detrás dos establecementos tamén hai familias que necesitan que se volva aos postos de traballo”, engadiu.
En todo caso, tamén precisou que “para que isto sexa unha realidade necesitamos a colaboración e implicación de todas as administracións”. Entre outras medidas, os hostaleiros lucenses pídenlles aos concellos que “todas as taxas e impostos municipais vinculadas cos establecementos de hostalería sexan 0″, ademais de solicitar unha moratoria no pago do IBI durante o 2021.
Ademais, reclaman a “posibilidade de utilizar máis espazos en terrazas, onde nunca se valoraron poñelas, para favorecer o mantemento do emprego”, así como a ampliación de horario en bares, restaurantes e terrazas”. Outra das medidas que piden os hostaleiros pasa por “facilitar a colocación de mesas altas ou barrís nas fachadas daqueles que teñen menos espazo na vía pública”, ademais de “peonalizar rúas para poñer e ampliar veladores”.
Piden, por outra banda, “facilitar a xestión e trámites de terrazas, para a súa concesión”, ademais de “lanzar liñas de axudas directas aos sectores máis castigados, como é a hostalería e o turismo”.
