Perruquerías e algúns comercios pequenos abriron este luns as portas con cita previa, no marco do comezo da fase 0 de desescalada. Grandes listas de espera, unha extrema hixiene e un cadro de persoal reducido son as constantes na reapertura deste tipo de establecementos.
A voceira da Asociación de Empresarios de Perruquería e Estética da provincia de Lugo, Miriam Pérez, explicou que o seu salón de beleza acumula unha lista de espera de dúas semanas, situación que é común aos distintos locais repartidos por toda a provincia tras case dous meses de peche.
Pérez tamén sinala que diminuíu nun 30% o persoal do seu salón de beleza de Lugo para tentar garantir as distancias de seguridade. Algunhas perruquerías tiveron que colocar biombos e incrementar o espazo entre os asentos nos que se atenden os clientes, aínda que a voceira do sector en Lugo optou pola vaporización de ozono.
Desinféctase o calzado dos usuarios e o persoal traballa con equipos de protección individual (EPI’s). Ademais, a atención a colectivos vulnerables lévase a cabo nunha sala diferenciada e de modo individual.
Con todo, Miriam Pérez coincide con compañeiros de sector que traballan noutras provincias á hora de lamentar a pouca antelación coa que se dispuxo a normativa sobre o material de protección necesario.