A área sanitaria de Lugo rexistra este xoves 30 de abril un total de 241 casos activos por coronavirus, tres menos ca no día de onte. A última actualización de datos ofrecida pola Consellería de Sanidade amosa unha redución importante no número de pacientes con coronavirus ingresados nos hospitais da provincia: catro nas Unidades de Coidados Intensivos e oito en planta.

As Uci teñen hoxe tres doentes menos, ata situarse en tan só catro. Dous deles permanecen na Uci do Hospital Público da Mariña e os outros dous están a ser atendidos na do HULA. Este dato vén acompañado da diminución de hospitalizacións en planta, onde só oito persoas continúan ingresadas (catorce menos ca onte e todas elas en centros da capital luguesa).

Por outra banda, Sanidade informa de 229 persoas con positivo en coronavirus baixo atención hospitalaria a domicilio (+14).Así mesmo, notifícanse 583 curacións (+11 respecto de onte). As vítimas mortais da pandemia mantéñense en 26.

CAMBIOS NO RECONTO

Cómpre lembrar que a Xunta de Galicia cambiou onte o protocolo de información sobre a pandemia. Agora inclúe todas as altas epidemiolóxicas e non só as hospitalarias; é dicir, considera “pacientes curados” a aqueles en domicilio que conten con PCR negativa ou que leven “tempo” asintomáticos para considerar “clinicamente” que superaron a doenza. Iso inflúe, polo tanto, no significativo descenso dos positivos documentados, que pasaron de 675 o martes a 244 no día de onte.

GALICIA

Tamén no conxunto da comunidade galega se percibiu unha baixada importante na presión das Unidades de Coidados Intensivos, que pasaron de 73 a 47 nun día.  Tralo cambio no reconto da Xunta, os casos activos por COVID-19 sitúanse nos 3.486 (-40) e as altas ascenden ata as 5.573 (+180). Despois de que onte non se rexistrara ningunha morte relacionada co virus en Galicia, hoxe os falecementos volven ascender ata os 551 tras o pasamento de catro persoas.