A área de Medio Ambiente do Concello de Lugo fai un chamamento cidadán para estender a petición de manter abertos os colectores de lixo de carga traseira mentres dure a crise sanitaria. O edil responsable, Álvaro Santos sinala que se trata dun pequeno xesto pero, en cambio, fundamental para evitar novos contaxios.

“Dende que se decretou o Estado de Alarma os operarios do servizo municipal de limpeza, logo de recoller os desperdicios, deixan abertos este tipo de contedores para evitar que os usuarios teñan que tocalos cando van depositar os seus refugallos”, explican. Por iso, solicitan a colaboración de toda a veciñanza para que cando os vexan destapados non os pechen.

Santos Ramos indicou que a administración local está tratando de difundir esta mensaxe a través das redes sociais e dos medios de comunicación “pero, sabemos que o boca a boca é o altofalante máis eficaz, por iso tamén lle pedimos a todas e todos os lucenses que divulguen esta medida entre os seus contactos e mesmo nas comunidades onde residan”.

MÁXIMA HIXIENE

O concelleiro de Medio Ambiente subliñou igualmente a importancia de extremar a hixiene persoal e recomendou “lavar frecuentemente as mans con auga e xabón e portar sempre un par de luvas, por se fora inevitable entrar en contacto con algún elemento do mobiliario urbano. Toda a cidade, incluídas as dotacións que están na vía pública como papeleiras, bancos, varandas, marquesiñas do bus e, por suposto, os colectores son desinfectados periodicamente, sen embargo é fundamental que, a nivel individual, tomemos todas as precaucións posibles para non propagar o coronavirus”.

Así mesmo lembrou que nestes momentos se mantén suspendido o servizo de retirada de voluminosos, polo que, dende a área de Medio Ambiente se insta á poboación a evitar desbotar este tipo de obxectos na rúa e recorda que, por outra banda, existe outro servizo específico de recollida a domicilio para aquelas persoas diagnosticadas da Covid-19 que poden solicitar chamando ao teléfono 092, da Policía Local.