O goberno local de Lugo, a través da concellería de Medio Ambiente, activou un dispositivo especial de recollida de lixo a domicilio para os veciños e veciñas afectadas polo Covid-19.
Baixo este plan, calquera persoa do concello de Lugo que estea diagnosticada por coronavirus pode solicitar o servizo a través do teléfono da Policía Local, o 092. A persoa demandante deberá facilitar unha serie de datos e, na maior brevidade posible, recibirá indicacións para programar a recollida do lixo con total seguridade para o resto da comunidade de veciños.
Este plan municipal procura axudar na contención da pandemia, así como evitar o contaxio da veciñanza e dos traballadores dos servizos de recollida e de tratamento de residuos.
