Ao longo da tarde deste domingo, un coche da Garda Civil paseouse polas rúas de Vilalba para avisar a través de altofalantes da necesidade de permanecer nas casas agás por cuestións esenciais.
A alerta sanitaria xerada pola expansión do coronavirus obriga a todas as persoas a gardar corentena durante 15 días, como mínimo, o que implica a limitación dos desprazamentos e da mobilidade. A veciñanza só pode saír das súas vivendas para satisfacer necesidades básicas: asistir a centros sanitarios, comprar alimentos, medicamentos ou produtos de primeira necesidade, coidar das persoas que o necesiten pola súa dependencia ou tamén para ir a entidades financeiras ou de seguros. Ademais, permítese saír das casas para ir e volver do traballo.
Incumprir estas medidas, acordadas polo Goberno estatal a través dun Real Decreto que permitiu a aplicación do estado de alarma, pode acarrexar sancións.
