O goberno local de Lugo informou de que tanto a Casa Consistorial como a Muralla romana -en concreto o tramo da Mosqueira- tinguiranse o venres e o sábado -20 e 21 de setembro- de violeta en apoio á campaña #Emerxencia Feminista e tamén para conmemorar o día Mundial do Alzheimer.

“O Concello de Lugo secundará mañá os actos promovidos polos colectivos integrantes do movemento feminista, co que as organizacións participantes queren declarar unha alerta sen tregua sobre as agresións machistas“, explicou a alcaldesa da cidade, Lara Méndez.

“Despois dun verán negro, no que os medios de comunicación están a informar diariamente de múltiples ataques e asasinatos, as institucións non poden permanecer alleas a esta secuela inadmisible en calquera estado democrático”, engadiu.

Por iso, o goberno local de Lugo tamén promoverá “un pronunciamiento público da corporación municipal en repulsa a calquera forma de violencia contra as mulleres e contra a normalización da mesma”.