A presidenta do Banco de Alimentos de Lugo, Amadora Núñez, demandou tanto á Xunta como ao Concello un “maior” apoio económico, por unha situación económica complicada ao arrastrar unha débeda de 12.000 euros.
A pesar das datas, Núñez testemuña que seguen “traballando a lume de biqueira” e insiste en pedir a mediación das administracións asegurando que eles están a suplir o que sería a súa obriga.
Incide en que traballan con “moita xente”, nunha nave da rúa Comercio no polígono industrial do Ceao, onde almacenan toda a mercadoría con que se lles obsequia.
Dan cobertura a máis de 2.000 familias, segundo os seus números, “de aquí, pero tamén de Cuba, Venezuela, Colombia, Uruguai e Arxentina”, e despois tamén atenden a “moitos refuxiados”. “Témonos que empregar a fondo”, subliña.
O banco reparte alimentos dúas veces á semana, os martes e os venres, e a presidenta calcula que se distribúen da orde de “17 a 20 toneladas” de comida. “Mentres quede un quilo de comida non se lle vai negar a ninguén. Imos seguir resistindo”, conclúe a activista lucense.
