A alcaldesa de Lugo, Lara Méndez, fixo un chamamento á concienciación e á prudencia dos veciños da cidade para que non entren no edificio do Garañón e así se eviten sucesos como o acontecido este fin de semana, cando os bombeiros tiveron que sufocar un incendio declarado na planta baixa das torres abandonadas.
Méndez asegurou que desde o equipo de goberno seguirán tomando medidas de seguridade para que a xente non poida acceder á zona. Unhas medidas que en moitos casos “se vulneran”, polo que insiste en concienciar que se trata dun perigo.
“Seguiremos dando pasos para evitar que as persoas poidan penetrar no edificio ata que non finalice o último mandato, que é o derrubamento das torres. Os técnicos están a valorar a mellor opción porque xa fora perimetrado e valado e trátase de buscar o equilibrio entre unha medida provisional e unha solución ata que non se produza o derrubamento das mesmas”, explicou.
