EFE- O Sergas informou de que o Hospital Universitario Lucus Augusti (HULA) rexistrou no primeiro semestre deste ano unha redución das listas de espera medias. Estes datos refírense tanto ás consultas externas, como ás intervencións cirúrxicas e probas diagnósticas. Son “os mellores resultados dos últimos anos”, presumen dende o Servizo Galego de Saúde.
De acordo cos datos facilitados polo Servizo Galego de Saúde, o HULA situou a espera media para ser sometido a unha intervención cirúrxica en 38,6 días -un día menos que no mesmo período do ano pasado-, mentres que a demora para pasar por consultas externas queda en 38 días.
Neste primeiro semestre do ano, os especialistas do HULA atenderon 174.170 consultas e realizaron 8.480 operacións. Nos centros de saúde, foron atendidas nos seis primeiros meses do ano 1,7 millóns de consultas, 1.588 máis que no mesmo semestre do ano anterior e cun “alto nivel de capacidade resolutiva”, segundo indica o Sergas. EFE
