O voceiro do grupo municipal do PP, Ramón Carballo, denuncia a “nula intención” do goberno local para que se constrúa a rotonda de Alfonso X coa N-VI. Dous anos e oito meses despois de que o Ministerio de Fomento solicitase a cesión de terreos, o Concello “non cumpriu coas súas obrigas”, asegura o popular
Ramón Carballo explica que, en novembro do 2016, o Ministerio de Fomento -daquela en mans populares- solicitou a cesión dos terreos para a execución do proxecto, “solicitude que se remitiu tanto ao Concello como á Deputación”. Porén, sostén que o Concello foi a única desas tres administracións que non mostrou vontade ningunha en rematar co “punto negro” que é o citado cruce en Alfonso X coa N-VI.
“A realidade amosa que se van cumprir tres anos desde que Fomento realizou a petición. A Deputaicón xa puxo a disposición de Fomento os terreos necesarios, mentres que Lara Méndez se segue a demorar de xeito inxustificado e inescusable”, critica Carballo. Cualifica esta actitude de “boicot” e “freo”.
“Entendiamos que torpedeara a construción da nova rotonda” cando había un goberno popular, di. “Pero agora, cun goberno socialista en Madrid, non sabemos que motivos pode ter Lara Méndez para torpedear o proxecto”.
Así, Ramón Carballo esixe que o Concello mova ficha e facilite a iniciación deste proxecto para o cal o único “impedimento” que hai, di, é o que pode supoñer a alcaldesa.
