O BNG de Outeiro de Rei vén de convocar a veciñanza a un acto reivindicativo para reclamar o acondicionamento dun paso seguro para os peóns na estrada N-VI.
“A situación existente no concello de Outeiro de Rei é un caso único entre o tramo de N-VI entre A Coruña e Madrid, pois non existe ningunha vila onde non haxa ningún paso para poder cruzala dun lado a outro“, denuncian os nacionalistas. Apuntan directamente á “pasividade” do Concello e á negativa de distintos Gobernos estatais para poñerlle solución ao problema.
E é que non é a primeira vez que se mobilizan para facer visibles as súas demandas. Hai uns meses, as súas protestas obtiveron resultados ao instalarse un paso de peóns fronte á farmacia, na estrada de Castro. “Foi un primeiro paso”, di o voceiro do BNG, Xosé Ferreiro, pero aínda así non pararán ata conseguir “o verdadeiramente importante”: os pasos seguros na N-VI. “Hai catro carrís e resulta imposible cruzalos sen arriscar a vida das persoas”, salientan.
“Un paso de peóns, semáforos, unha rotonda, un paso elevado… Hai centos de solucións posibles”, pero aseguran que son necesarias porque a disposición das vivendas e dos negocios da vila obriga as persoas a cruzar con frecuencia a estrada.
SOLICITAR A TRANSFERENCIA DUN TRAMO DA N-VI A FOMENTO
Ademais, dende o BNG tamén piden a urbanización da N-VI ao seu paso pola localidade. Para iso, reclaman que o Concello solicite a transferencia deste tramo a Fomento, unha vez urbanizada, para poder convertela en travesía urbana. “Calquera solución ao bloqueo do urbanismo en Outeiro de Rei pasa por eseta medida”, concluíu Ferreiro.
