Sete persoas foron detidas en Galicia, concretamente en varias localidades da provincia de Pontevedra e en Lugo, no marco dunha operación contra o branqueo de capitais coordinada pola Audiencia Nacional.

En declaracións aos medios en Brión, o delegado do Goberno en Galicia, Javier Losada, indicou que a chamada operación Arco, que segue aberta e sobre a que se decretou o segredo das actuacións, afecta a outros puntos do territorio nacional. O número total de detidos elévase a dez.

Entre os arrestados nesta operación figuran familiares do histórico narcotraficante de Cambados Juan Carlos Fernández Cores, alias ‘O Parido’, quen está actualmente en prisión.

Ademais das detencións, practicáronse rexistros en Lugo, Pontevedra, Vigo, Nigrán, Cambados, Sanxenxo, A Cañiza e tamén en Portugal, concretaron a Efe fontes da investigación. Nestes rexistros, a Policía interveu numerosa documentación, bens inmobles e dúas armas, detallan as fontes.