Os sindicatos agrarios trasladaron este luns o seu pésame á familia do propietario de Leite Río, Jesús Lence, polo seu falecemento e mostraron o seu desexo de que a empresa siga funcionando no futuro en Galicia.

En primeiro lugar, o secretario xeral de Unións Agrarias, Roberto García, destacou “a forma de xestión moi persoal” que estendeu ao longo de toda a súa carreira empresarial e considerou que a ausencia “clara” dunha solución de futuro para a entidade pode xerar “incerteza”.

No entanto subscribe que “de momento non hai elementos para preocuparse excesivamente”. “Vai haber un antes e un despois do papel do grupo Leite Río no incremento da produción de leite en Lugo e en Galicia”, encomia. Tamén recoñeceu que “está a dúbida de cal vai ser a decisión dos herdeiros con respecto a continuar ou como empresa familiar ou trocearla”.

Pola súa banda, o coordinador de Fruga en Lugo, Elías Somoza, considerou que “independentemente das diferenzas que puido haber no seu momento con Lence e coa empresa, é o momento de darlle o pésame á familia”.

Tamén puxo en valor cosas que feitas polo empresario lucense, ao sinalar que Lence “foi un empresario que no seu momento chegou a ser das persoas que máis leite recollía no país” “Desde o noso punto de vista foi un empresario imprescindible no sector lácteo galego. Agora hai que ver o futuro da empresa, esperamos que siga funcionado”, subliñou.

Ademais, a secretaria xeral do Sindicato Labrego Galego, Isabel Vilalba, puxo o acento en que a empresa “recolle menos leite que fai tres anos, aínda que segue sendo unha das primeiras firmas de Galicia”. Neste sentido, asegurou que “unha cuestión importante é saber si esta empresa vai seguir apostando por seguir en Galicia e si vai apostar por recoller leite e pagala, para darlle valor engadido”.

Entre 500 e seiscentos son os produtores lácteos aos que recollía leite Jesús Lence.