Situada na cima dunha ladeira, unha casa de algo máis de 200 metros cadrados en forma de L e inspirada nos hórreos acaba de ser rematada en Vilalba. É obra do arquitecto galego afincado en Berlín Javier Sanjurjo, que realizou co estudo galego Ameneiros Rey e a encargo dos seus propios pais.
Precisamente porque a accesibilidade para cadeiras de rodas era un elemento crucial para a familia de Sanjurjo, o arquitecto deseñou unha nova estrutura elevada que permite que o espazo habitable estea nun só nivel. Así, a fonte de inspiración foi unha estrutura agrícola tradicional: o hórreo, que se levanta sobre o chan. A casa, segundo publica Wallpaper, é definida polo arquitecto como “un exercicio de suficiencia sobre o exceso”. Unha casa “de sinxeleza austera e admirable” que “aproveita ao máximo o solar elixido”. Nela, unha escaleira conduce dende a planta baixa ata o espazo habitable.
Está deseñada en dúas ás, día e noite. Todas as habitacións principais teñen vistas orientadas ao suroeste, cun balcón orientado ao oeste accesible desde a sala de estar. Hai dormitorios, unha cociña estilo tradicional e unha sala de estar de planta aberta. O acceso dos vehículos realízase a través dun camiño sinuoso que rodea a casa antes de terminar en dous espazos de estacionamento. A entrada principal atópase a través dunha ponte nova desde a estrada principal.
A terraza ofrece “vistas privilexiadas” ao bosque e ao río, xa que segundo publica Wallpaper, o arquitecto buscaba a sensación de “estar a flotar sobre as árbores“. A contrución realizouse cunha combinación de materiais de baixo custo “con detalles funcionais e un compromiso coa simplicidade”.
