A rúa Menorca de Lugo será como o “Paseo da Fama” de Hollywood, pero non con nomes de estrela do cinema, senón palabras estrela do galego. Así, nela instalaranse as distintas palabras do ano escollidas pola Real Academia Galega (RAG) desde o 2014 ao 2020. Precisamente, este luns o tenente de alcalde e concelleiro de Mobilidade e Infraestruturas, Rubén Arroxo, xunto con Maite Ferreiro, concelleira de Cultura, Turismo e Promoción da Lingua e o presidente da Real Academia Galega, Víctor Freixanes, visitaron a rúa peonil.
“Con esta iniciativa queremos seguir coa mellora da imaxe da cidade ao mesmo tempo que poñemos en valor un símbolo tan importante como a lingua galega”, dixo Rubén Arroxo. Así, destacou que seguirán colocando, cada ano, a palabra que a Real Academia designe como palabra galega máis utilizada e sinalou que “o futuro da nosa lingua está vivo e as palabras de cada ano pasan a formar parte do idioma xa que sintetizan parte da realidade de cada época”.
A Palabra do Ano é escollida no Portal das Palabras cada ano. En 2012, a RAG e a Fundación Barrié, asinaron un convenio de colaboración en materia de lexicografía. Para a colocación das palabras utilizouse un material duradeiro e que permitirá unha boa e sinxela visibilidade do texto. Vai acompañando a cada verba o ano no que foi nomeada pola Real Academia, no Portal das Palabras, como palabra do ano.
As seis palabras do ano escollidas até o de agora son: corrupción (2014), refuxiados (2015) , irmandade (2016) , afouteza (2017) , deseucaliptización (2018) , sentidiño (2019) e Nós (2021) . A última das palabras gañadoras, Nós, fai referencia a toda unha xeración e Castelao titulou, con acerto, os debuxos deste proxecto co pronome tónico da primeira persoa do plural porque as tres letras que o conforman abondan para retratármonos como pobo, como cultura.
