A alcaldesa de Vilalba, Elba Veleiro, lamentou o “fracaso de todas as ferramentas” previstas na Lei para evitar a morte, como consecuencia da violencia machista, de María del Carmen Vázquez Cereijo, a muller de 47 anos que presuntamente foi asasinada este pasado fin de semana polo seu marido, co que estaba en trámites de separación.
En declaracións a Efe, a rexedora local informou de que o Concello de Vilalba decretou tres días de loito oficial pola “fonda tristeza” que provocou este crime entre os veciños do municipio. “Mestúrase esa fonda tristeza coa indignación e o rexeitamento total a este tipo de sucesos”, dixo a alcaldesa, porque ademais da violencia machista, neste caso púxose de manifesto o “fracaso das ferramentas” para protexer ás mulleres cando están nunha situación de vulnerabilidade.
“Vimos o fracaso de todas as ferramentas para evitar que se chegue ás últimas consecuencias da violencia machista”, lamentou, dado que María del Carmen Vázquez foi presuntamente asasinada o seu marido cando un xuíz xa decretara unha orde de afastamento con respecto á vítima e tiña prohibido achegarse a ela a menos de 300 metros.
