O deputado responsable da área de Turismo da Deputación de Lugo, Eduardo Vidal, presentou unha demanda “de conciliación” no xulgado de instrución número un de Lugo ao viceportavoz do PP na institución, Carlos Armesto, logo de que este o acusase de falsidade documental, no relativo ás rutas fluviais.
Tal e como anunciara no último pleno Vidal, a ameaza cumpriuse despois de que Armesto non se desdixese desa acusación de “falsidade documental no relativo aos permisos para o desenvolvemento das rutas fluviais”, a través dos distintos catamaráns cos que opera o goberno provincial na Ribeira Sacra.
O deputado de Turismo, que presentou el mesmo a demanda de conciliación que podería acabar na vía penal se finalmente non se produce unha rectificación, advirte que “non” vai consentir ” que por motivos políticos se exceda o límite da mentira”, que se lle “calumnie, inxurie e acuse de falsificar documentos” no exercicio das súas funcións”.
Así as cousas, incidiu en que, ao non mediar “rectificación”, viuse obrigado a “tomar accións legais”. Ademais, avanzou que está disposto a acudir á vía penal.
