Representantes do Partido Popular de Lugo no Congreso e o Senado visitaron este mércores as instalacións de Auxilia na cidade de Lugo para coñecer de primeira man a actividade desta entidade e anunciar a presentación de preguntas parlamentarias ao Goberno central pola súa exclusión das axudas estatais destinadas a organizacións especializadas no ámbito da discapacidade.
Os senadores José Manuel Barreiro, José Manuel Balseiro e Juan Serrano, xunto coa deputada Cristina Abades, preguntarán ao Executivo polos motivos polos que Auxilia quedou fóra das subvencións de concesión directa do Ministerio de Dereitos Sociais, Consumo e Axenda 2030, despois de recibir este apoio durante os últimos anos.
Como explica o PP, Auxilia é unha entidade de voluntariado sen ánimo de lucro fundada en 1972. Con máis de cinco décadas de traxectoria, desenvolve na provincia de Lugo programas de atención, acompañamento, integración e promoción da autonomía de persoas con discapacidade física e enfermidades crónicas.
A exclusión prodúcese tras a aprobación do Real Decreto 642/2026, de 29 de xullo, que establece as entidades beneficiarias destas axudas.
Os populares queren saber tamén se o Goberno contempla corrixir a decisión ou adoptar algunha medida para compensar o impacto que poida ter sobre a organización e sobre as persoas ás que presta atención.
O PP sostén que a medida supón “un enorme prexuízo” para Auxilia e advirte de que “compromete a continuidade dos programas destinados ás persoas con discapacidade física e enfermidades crónicas”.
Os representantes populares consideran especialmente difícil de entender a decisión porque o propio Real Decreto recoñece o papel esencial das entidades especializadas en discapacidade para garantir a igualdade de oportunidades e o exercicio efectivo dos dereitos das persoas con discapacidade, ademais de xustificar estas subvencións pola súa experiencia, especialización técnica e capacidade organizativa.
Por iso, os deputados e senadores lucenses reclaman explicacións ao Executivo e cualifican a exclusión de “un novo castigo a Lugo”, agravado, ao seu xuízo, por afectar á atención de persoas en situación de vulnerabilidade.
