Os deputados do Grupo Parlamentario Popular explicaron este luns nunha nota de prensa que abordarán, nunha serie de reunións por toda a provincia de Lugo, os problemas e as necesidades dos 67 concellos para poder incorporalos aos orzamentos do próximo ano.
O portavoz provincial, Antonio Meijide, esgrimiu que “unicamente” apoiándose nos representantes de cada municipio é como poden chegar a coñecer “todas as necesidades” que dependen da Deputación.
Neste sentido, sinalou que estes, ao estar en contacto directo cos veciños, son os “mellores coñecedores” do que debe facer a Deputación en cada municipio, polo que sentar con eles e escoitalos é “o único camiño para poder corrixir todas estas deficiencias”.
Por outra banda, unha vez terminadas as reunións con representantes dos 67 concellos, o Grupo Provincial Popular realizará un documento que “recolla todas as peticións e necesidades” para trasladalo ao goberno provincial de PSOE e BNG e que o teñan en conta para incorporalo aos orzamentos de 2025.
