A presidenta provincial do PP de Lugo, Elena Candia, e a deputada lucense no Congreso, Cristina Abades, anunciaron este venres a presentación de senllas iniciativas tanto na Cámara Alta como na Cámara Baixa para solicitar ao Goberno de Pedro Sánchez a ampliación dos “prazos” e o “orzamento” das axudas para a rehabilitación de contornas urbanas co fin de que os barrios lucenses da Milagrosa e Feijóo poidan optar tamén a estes fondos europeos.
Todo iso despois de que o Goberno local, denunciaron os populares nunha rolda de prensa convocada este venres en Lugo e na que tamén participaron concelleiras e senadores do partido, delimitase “fóra do prazo establecido” a contorna residencial de rehabilitación programada (ERRP) dos devanditos barrios deixando aos seus veciños excluídos da cobertura das axudas a título “colectivo”.
“Para acceder a estas axudas, os concellos tiñan que delimitar as contornas, os ERRPs, e fixérono en tempo para algunhas zonas da cidade pero non para os barrios de Feijóo e A Milagrosa“, explicou, durante a súa intervención, a deputada popular Cristina Abades, que acusou ao Goberno local, encabezado pola socialista Paula Alvarellos, de “falta de dilixencia” durante o proceso e de “deixar pasar unha oportunidade magnífica”.
Nunha liña moi similar manifestouse a presidenta provincial do partido, Elena Candia, que incidiu ante os medios na “oportunidade perdida” por parte do Executivo local ao deixar sen investimento a dous barrios da capital lucense que, subliñou, “necesitan orzamento” e “un compromiso”.
Tamén aproveitou Candia a súa presenza na Milagrosa para “lembrar aos veciños” a existencia dunha liña de axudas para mellorar a eficiencia enerxética de vivendas e edificios de vivendas posta en marcha por parte da Xunta de Galicia con fondos europeos Next Generation e aberta para solicitudes a título persoal, precisou, “ata o 13 de setembro”.
Finalmente, compareceu ante os medios o novo viceportavoz municipal do grupo, Ramón Cabarcos, que afeou ao Goberno local a súa “falta de axilidade nas tramitacións” da delimitación das contornas residenciais dos barrios da Milagrosa e Feijóo logo de que as mesmas axudas solicitadas para a contorna do centro histórico si que fosen presentadas “en tempo”.
“Dous días despois de que expirase o prazo, o Concello anunciou a contratación da memoria que delimitaría o contorno da ERRP do barrio da Milagrosa, completamente fóra de prazo, o que motiva a imposibilidade de recibir axudas deste tipo para o barrio a nivel colectivo”, sinalou.
