O deputado do BNG no Congreso, Néstor Rego, e o tenente de alcalde de Lugo, Rubén Arroxo, xunto co responsable local do BNG en Lugo, Felipe Rivas, entregaron en Madrid as firmas recollidas na campaña ‘Lugo quere tren’, organizada polo BNG.
A formación nacionalista reclama poñer Lugo “no mapa dos servizos ferroviarios” e finalizar con “anos de recortes e eliminación de conexións e frecuencias”, para que Lugo e Galicia “conten con servizos dignos, con conexións útiles, pensadas para conectar os galegos”.
Representantes do BNG entregaron estas firmas, máis de 4.000, recollidas entre a veciñanza. “Lugo é unha cidade que está a quedar totalmente illada do resto de Galicia e do conxunto do Estado”, advertiu Arroxo. Así, avisou de que, cando se fala do AVE, está “a retirarse e elimiando as poucas conexións e frecuencias que tiña a capital luguesa”, á vez que se “desmantela este servizo”, coa supresión de liñas como consecuencia do confinamento e a pandemia.
O BNG seguirá traballando en Lugo para conseguir que o Ministerio de Transportes “atenda as demandas” da veciñanza, xa que Lugo “ten dereito” a contar cos mesmos servizos que o resto de cidades.
Pola súa banda, Néstor Rego lembrou que son xa “numerosas” as iniciativas do BNG no Congreso para conseguir este fin. “Cremos que Lugo é un caso paradigmático de desmantelamento dos servizos ferroviarios”, lamentou, para avanzar que seguirán “insistindo” con máis iniciativas para conseguir os obxectivos.
