O presidente da Deputación de Lugo, José Tomé, reclamou á Xunta de Galicia un “plan industrial” para A Mariña, tras o inminente peche de Vestas e polo apagamento das cubas en Alcoa.
Despois da xunta de goberno provincial, sobre Vestas, quecesará a actividade o un de xaneiro, expuxo que “cando pecha unha empresa é unha mala noticia, aínda que dentro da mala noticia parece que houbo un acordo para retirar o ERE que acordaron entre traballadores e empresa“.
“Por tanto parece que se abre unha solución en canto a indemnizacións, á venda da nave –en Chavín, Viveiro–“, expuxo. Respecto de Alcoa, sinalou que “se falaba de que quen tiña que estar vixiante e tomar medidas era o Ministerio de Industria, aquí quen ten que tomar medidas é a Xunta de Galicia”.
Ao fío diso, subliñou que espera que o Goberno galego “tome medidas e elabore un plan industrial para A Mariña.“Para que todas as persoas que ven afectadas e poden deixar o seu emprego a curto ou medio prazo poidan recolocarse e que non sufra economicamente A Mariña porque tamén sofre o conxunto da provincia”, resolveu.
De novo sobre Alcoa, indicou que “cando hai un acordo sempre é positivo, outra cousa é que fose o mellor posible”. “Cando se produce un acordo, eu sempre aposto por ese acordo outra cousa é que imos ter que estas vixiantes todos para que a empresa cumpra o que pacta”.
Tomé insistiu en que o acordo “é a mellor opción e o Ministerio –de Industria– xa dixo que ía estar moi pendente do que suceda”.
