A conselleira de Infraestruturas e Mobilidade, Ethel Vázquez, remarcou que a estación intermodal de Lugo ten que recibir financiamento a través dos fondos europeos de reconstrución, do mesmo xeito que a da Coruña, para o aparcadoiro subterráneo da terminal, e neste sentido, celebrou que os orzamentos estatais prevexan recursos procedentes desta vía.
Vázquez, na presentación dos investimentos do seu departamento para a provincia de Lugo, precisou sobre a intermodal que a aposta da Xunta “é clara e decidida, como en todas as estacións intermodais”.
“A de Ourense está en servizo grazas á Xunta, falta a parte ferroviaria, en Santiago en servizo tamén, quedando pendente esa parte ferroviaria do Goberno de España. Temos dúas estacións intermodais en servizo, e Pontevedra a piques de concluír. Nós queremos seguir traballando e que Lugo teña tamén a súa estación intermodal“, comprometeu.
A conselleira explicou que “se traballa en dúas frontes: o que é o proxecto construtivo que está a redactar Adif e que ten unha parte que é o edificio de Correos e dixemos desde 2018 que se debe de realizar a modificación urbanística correspondente, e desde ese ano a Xunta espera a que se resolva urbanisticamente por parte do concello (de Lugo), xunto con Adif para avanzar no proxecto”.
FALTA O CONVENIO DE FINANCIAMENTO
Tras iso, precisou que faltaría “o convenio de financiamento das actuacións, nas que a Xunta espera que o Goberno de España se pronuncie sobre a última proposta”.
“Nós vendo os orzamentos, onde o Goberno de España destina case cinco millóns de euros á estación intermodal de Lugo, desde logo celebramos que Adif destine eses fondos de reconstrución ao aparcadoiro como demandaramos”, subliñou.
Ethel Vázquez apelou a que “se a cidade da Coruña ten fondos de reconstrución (Next Generation) para a intermodal, a intermodal de Lugo tamén debería de ter eses fondos de reconstrución, como se demanda”.
“Na nosa opinión, grafiando os investimentos do Estado, entendemos que eses fondos de reconstrución van facer a intermodal de Lugo, o aparcadoiro. A día de hoxe, esperando a que Adif e o concello resolvan urbanisticamente a problemática do edificio de Correos para estar en disposición de asinar o convenio, e nós case en disposición porque nosa parte que é a estación de autobuses non afecta a ese edificio e xa estariamos en disposición de licitar”, resolveu.
