“Na nova Xunta Directiva de Ciudadanos Lugo asumimos con ilusión e confianza este novo período que se abre ante nós. Son tempos difíciles. Á pandemia sanitaria súmase unha pandemia política crónica para a que, agora máis que nunca, hai que empezar a buscar unha vacina”. Son as primeiras valoracións do novo coordinador local da agrupación de Cs en Lugo, José Álvarez Flores, tras a súa elección.

Na súa intervención apostou pola “moderación, o diálogo, a rexeneración e o sentido común” e criticou as “liortas” entre os partidos políticos. “Estas loitas e desencontros entre as distintas administracións e grupos políticos é un fiel reflexo do que non debe ser a política, usando como arma conflitos para desgastar ao rival político, cando en realidade os máis prexudicados son os cidadáns aos que se di servir”, dixo o novo coordinador en clara referencia á falta de entendemento evidenciado polos políticos galegos.

“Cremos nunha sociedade de cidadáns libres e iguais, moderna, sen complexos, orgullosa do seu pasado, inquieta polo seu presente e disposta a loitar, con esforzo, esperanza e determinación, polo seu futuro”, concluíu.