A formación Vilalba Aberta denunciou publicamente este martes “unha intolerable campaña” difamatoria contra o concelleiro e voceiro do grupo, Modesto Renda, a quen lle trasladaron o seu “incodicional apoio” fronte a uns supostos boatos —noticias falsas— que circulan a través de WhatsApp.
Vilalba Aberta, que integra o goberno local canda o PSOE, lamentou os “ataques vertidos” contra Modesto Renda, que previamente xa compartira nas súas redes sociais unha longa carta aberta á veciñanza para pronunciarse sobre a situación. Na carta, publicada o domingo 10 de maio, denunciaba ser vítima dunha campaña “artellada a nivel local” dende uns días antes co “único obxectivo” de “danar” a súa “honorabilidade” e a do grupo municipal que representa.
Renda, que non entrou en detalles sobre a “calumnia” difundida a través de WhatsApp, si que explicou que non é a primeira vez que ten que enfrontarse a situacións semellantes dende que se mergullou na política activa. Tales circunstancias mesmo o obrigaron a apartarse de proxectos máis alá do ámbito local. “Aí comecei a asumir que o ‘todo vale’ da política é real”, confesou o actual concelleiro de Comercio e Turismo en Vilalba.
Tanto el como a formación Vilalba Aberta advirten de que “calquera acusación ou difamación que atente contra a honorabilidade” do grupo ou da persoa particular “é susceptible de constituír un delito contra a honra que pode levar á interposición das medidas legais oportunas”.
